Abhayagiri Buddhist Monastery Redwood Valley, CA 95470, USA

www.abhayagiri.org

 

 

Devatā-sannipātapāṭha

 

Pharitvāna mettaṃ samettā bhadantā, avikkhittacittā parittaṃ bhaṇantu,

Sagge kāme ca rūpe girisikharataṭe cantalikkhe vimāne, dīpe raṭṭhe ca gāme taruvanagahane gehavatthumhi khette,

bhummā cāyantu devā jalathalavisame yakkha-gandhabba-nāgā, tiṭṭhantā santike yaṃ munivaravacanaṃ sādhavo me suṇantu.

Dhammassavanakālo ayambhadantā,

Dhammassavanakālo ayambhadantā,

Dhammassavanakālo ayambhadantā.

 

 

Namo tassa bhagavato arahato sammāsambuddhassa.

Namo tassa bhagavato arahato sammāsambuddhassa.

Namo tassa bhagavato arahato sammāsambuddhassa.

 

Saraṇagamana (KhN. Kh. 25/1)

 

Buddhaṃ saraṇaṃ gacchāmi.

Dhammaṃ saraṇaṃ gacchāmi.

Saṅghaṃ saraṇaṃ gacchāmi.

Dutiyampi Buddhaṃ saraṇaṃ gacchāmi.

Dutiyampi Dhammaṃ saraṇaṃ gacchāmi.

Dutiyampi Saṅghaṃ saraṇaṃ gacchāmi.

Tatiyampi Buddhaṃ saraṇaṃ gacchāmi.

Tatiyampi Dhammaṃ saraṇaṃ gacchāmi.

Tatiyampi Saṅghaṃ saraṇaṃ gacchāmi.

 

 

Namakārasiddhigāthā

 

Yo cakkhumā mohamalāpakaṭṭho,

sāmaṃ va buddho sugato vimutto,

mārassa pāsā vinimocayanto,

pāpesi khemaṃ janataṃ vineyyaṃ.

Buddhaṃ varantaṃ sirasā namāmi,

lokassa nāthañca vināyakañca,

tantejasā te jayasiddhi hotu,

sabbantarāyā ca vināsamentu.

 

Dhammo dhajo yo viya tassa satthu,

dassese lokassa visuddhimaggaṃ,

niyyāniko dhammadharassa dhārī,

sātāvaho santikaro suciṇṇo.

Dhammaṃ varantaṃ sirasā namāmi,

mohappadālaṃ upasantadāhaṃ,

tantejasā te jayasiddhi hotu,

sabbantarāyā ca vināsamentu.

 

Saddhammasenā sugatānugo yo,

lokassa pāpūpakilesajetā,

santo sayaṃ santiniyojako ca,

svākkhātadhammaṃ viditaṃ karoti.

Saṅghaṃ varantaṃ sirasā namāmi,

buddhānubuddhaṃ samasīladiṭṭhiṃ,

tantejasā te jayasiddhi hotu,

sabbantarāyā ca vināsamentu.

 

Namokāra-aṭṭhaka

 

Namo arahato sammā-, sambuddhassa mahesino,

namo uttamadhammassa, svākkhātasseva tenidha.

Namo mahāsaṅghassāpi, visuddhasīladiṭṭhino,

namo omātyāraddhassa, ratanattayassa sādhukaṃ.

Namo omakātītassa, tassa vatthuttayassapi,

namo kārappabhāvena, vigacchantu upaddavā.

Namo kārānubhāvena, suvatthi hotu sabbadā,

namo kārassa tejena, vidhimhi homi tejavā.

 

 

Maṅgalasutta (KhN. Kh. 25/7)

 

Asevanā ca bālānaṃ, paṇḍitānañca sevanā,
pūjā ca pūjanīyānaṃ, etammaṅgalamuttamaṃ.

 

Paṭirūpadesavāso ca, pubbe ca katapuññatā,
attasammāpaṇidhi ca, etammaṅgalamuttamaṃ.

 

Bāhusaccañca sippañca, vinayo ca susikkhito,
subhāsitā ca yā vācā, etammaṅgalamuttamaṃ.

 

Mātāpitu-upaṭṭhānaṃ, puttadārassa saṅgaho,
anākulā ca kammantā, etammaṅgalamuttamaṃ.

 

Dānañca dhammacariyā ca, ñātakānañca saṅgaho,
anavajjāni kammāni, etammaṅgalamuttamaṃ.

 

Āratī viratī pāpā, majjapānā ca saññamo,
appamādo ca dhammesu, etammaṅgalamuttamaṃ.

 

Gāravo ca nivāto ca, santuṭṭhī ca kataññutā,
kālena dhammassavanaṃ, etammaṅgalamuttamaṃ.

 

Khantī ca sovacassatā, samaṇānañca dassanaṃ,
kālena dhammasākacchā, etammaṅgalamuttamaṃ.

 

Tapo ca brahmacariyañca, ariyasaccānadassanaṃ,
nibbānasacchikiriyā ca, etammaṅgalamuttamaṃ.

 

Phuṭṭhassa lokadhammehi, cittaṃ yassa na kampati,
asokaṃ virajaṃ khemaṃ, etammaṅgalamuttamaṃ.

 

Etādisāni katvāna, sabbatthamaparājitā,
sabbattha sotthiṃ gacchanti, tantesaṃ maṅgalamuttamanti.

 

Ratanasutta (KhN. Kh. 25/7)

 

Yaṃ kiñci vittaṃ idha vā huraṃ vā,

saggesu vā yaṃ ratanaṃ paṇītaṃ,

na no samaṃ atthi tathāgatena,

idampi buddhe ratanaṃ paṇītaṃ.

Etena saccena suvatthi hotu.

 

Khayaṃ virāgaṃ amataṃ paṇītaṃ,

yadajjhagā sakyamunī samāhito,

na tena dhammena samatthi kiñci,

idampi dhamme ratanaṃ paṇītaṃ.

Etena saccena suvatthi hotu.

 

Yambuddhaseṭṭho parivaṇṇayī suciṃ,

samādhimānantarikaññamāhu,

samādhinā tena samo na vijjati,

idampi dhamme ratanaṃ paṇītaṃ.

Etena saccena suvatthi hotu.

 

Ye puggalā aṭṭha sataṃ pasaṭṭhā,

cattāri etāni yugāni honti,

te dakkhiṇeyyā sugatassa sāvakā,

etesu dinnāni mahapphalāni,

idampi saṅghe ratanaṃ paṇītaṃ.

Etena saccena suvatthi hotu.

 

Ye suppayuttā manasā daḷhena,

nikkāmino gotamasāsanamhi,

te pattipattā amataṃ vigayha,

laddhā mudhā nibbutiṃ bhuñjamānā,

idampi saṅghe ratanaṃ paṇītaṃ.

Etena saccena suvatthi hotu.

 

Khīṇaṃ purāṇaṃ navaṃ natthi sambhavaṃ,

virattacittāyatike bhavasmiṃ,

te khīṇabījā aviruḷhichandā,

nibbanti dhīrā yathāyampadīpo,

idampi saṅghe ratanaṃ paṇītaṃ.

Etena saccena suvatthi hotu.

 

Karaṇīyamettasutta (KhN. Kh. 25/10)

 

Mettañca sabbalokasmiṃ,
mānasambhāvaye aparimāṇaṃ,
uddhaṃ adho ca tiriyañca,
asambādhaṃ averamāsapattaṃ.

 

Tiṭṭhañcaraṃ nisinno vā,
sayāno vā yāva tassa vigatamiddho,
etaṃ satiṃ adhiṭṭheyya,
brahmametaṃ vihāramidhamāhu.

 

Diṭṭhiñca anupagamma,
sīlavā dassanena sampanno,
kāmesu vineyya gedhaṃ,
na hi jātu gabbhaseyya punaretīti.

 

Devatā-uyyojanagāthā

 

Dukkhappattā ca niddukkhā, bhayappattā ca nibbhayā,

sokappattā ca nissokā, hontu sabbepi pāṇino.

Etāvatā ca amhehi, sambhataṃ puññasampadaṃ,

sabbe devānumodantu, sabbasampattisiddhiyā,

dānaṃ dadantu saddhāya, sīlaṃ rakkhantu sabbadā,

bhāvanābhiratā hontu, gacchantu devatāgatā.

Sabbe buddhā balappattā, paccekānañca yaṃ palaṃ,

arahantānañca tejena, rakkhaṃ bandhāmi sabbaso.

 

Bojjhaṅgaparitta

 

Bojjhaṅgo satisaṅkhāto, dhammānaṃ vicayo tathā,

viriyampītipassaddhi-, bojjhaṅgā ca tathāpare,

samādhupekkhabojjhaṅgā, sattete sabbadassinā,

muninā sammadakkhātā, bhāvitā bahulīkatā,

saṃvattanti abhiññāya, nibbānāya ca bodhiyā,

etene saccavajjena, sotthi te hotu sabbadā.

 

Ekassmiṃ samaye nātho, moggllānañca kassapaṃ,

gilāne dukkhite disvā, bojjhaṅge satta desayi.

Te ca taṃ abhinanditvā, rogā mucciṃsu taṅkhaṇe,

etena saccavajjena, sotthi te hotu sabbadā.

 

Ekadā dhammarājāpi, gelaññenābhipīḷito,

cundattherena taññeva, bhaṇāpetvāna sādaraṃ,

sammoditvā ca ābādhā, tamhā vuṭṭhāsi ṭānaso,

etena saccavajjena, sotthi te hutu sabbadā.

 

Pahīnā te ca ābādhā, tiṇṇannampi mahesinaṃ,

maggāhatakilesā va, pattānupattidhammataṃ,

etena saccavajjena, sotthi te hotu sabbadā.

 

Ratanattayappaṇāma

 

Itipi so bhagavā arahaṃ sammāsambuddho,

vijjācaraṇasampanno sugato lokavidū,

anuttaro purisadammasārathi,

satthā devamanussānaṃ buddho bhagavāti.

 

Svākhāto bhagavatā dhammo,

sandiṭṭhiko akāliko,

ehipassiko opanayiko,

paccattaṃ veditabbo viññūhīti.

 

Supaṭipanno bhagavato sāvakasaṅgho,

ujupaṭipanno bhagavato sāvakasaṅgho,

ñāyapaṭipanno bhagavato sāvakasaṅgho,

sāmīcipaṭipanno bhagavato sāvakasaṅgho,

yadidaṃ cattāri purisayugāni aṭṭha purisapuggalā,

esa bhagavato sāvakasaṅgho,

āhuneyyo pāhuneyyo,

dakkhiṇeyyo añjalikaraṇīyo,

anuttaraṃ puññakkhettaṃ lokassāti.

 

Buddhajayamaṅgalagāthā

 

Bāhuṃ sahassamabhinimmitasāvudhantaṃ,

krīmekhalaṃ uditaghorasasenamāraṃ,

dānādidhammavidhinā jitavā munindo,

tantejasā bhavatu te jayamaṅgalāni.

 

Mārātirekamabhiyujjhitasabbarattiṃ,

ghorampanāḷavakamakkhamathaddhayakkhaṃ,

khantīsudantavidhinā jitavā munindo,

tantejasā bhavatu te jayamaṅgalāni.

 

Nāḷāgiriṃ gajavaraṃ atimattabhūtaṃ,

dāvaggicakkamasanīva sudāruṇantaṃ,

mettambusekavidhinā jitavā munindo,

tantejasā bhavatu te jayamaṅgalāni.

 

Ukkhittakhaggamatihatthasudāruṇantaṃ,

dhāvantiyojanapathaṅgulimālavantaṃ,

iddhībhisaṅkhatamano jitavā munindo,

tantejasā bhavatu te jayamaṅgalāni.

 

Katvāna kaṭṭhamudaraṃ iva gabbhinīyā,

ciñcāya duṭṭhavacanaṃ janakāyamajjhe,

santena somavidhinā jitavā munindo,

tantejasā bhavatu te jayamaṅgalāni.

 

Saccaṃ vihāya matisaccakavādaketuṃ,

vādābhiropitamanaṃ atiandhabhūtaṃ,

paññāpadīpajalito jitavā munindo,

tantejasā bhavatu te jayamaṅgalāni.

 

Nandopanandabhujagaṃ vibudhaṃ mahiddhiṃ,

puttena therabhujagena damāpayanto,

iddhūpadesavidhinā jitavā munindo,

tantejasā bhavatu te jayamaṅgalāni.

 

Duggāhadiṭṭhibhujagena sudaṭṭahatthaṃ,

brahmaṃ visuddhijutimiddhibakābhidhānaṃ,

ñāṇāgadena vidhinā jitavā munindo,

tantejasā bhavatu te jayamaṅgalāni.

 

Etāpi buddhajayamaṅgala-aṭṭhagāthā,

yo vācako dinadine sarate matandī,

hitvānanekavividhāni cupaddavāni,

mokkhaṃ sukhaṃ adhigameyya naro sapañño.

 

Jayaparitta

 

Mahākāruṇiko nātho, hitāya sabbapāṇinaṃ,

pūretvā pāramī sabbā, patto sambodhimuttamaṃ,

etena saccavajjena, hotu te jayamaṅgalaṃ.

 

Jayanto bodhiyā mūle, sakyānaṃ nandivaḍḍhano,

evaṃ tavaṃ vijayo hohi, jayassu jayamaṅgale.

 

Aparājitapallaṅke, sīse puthuvipukkhale,

abhiseke sabbabuddhānaṃ, aggappatto pamodati.

 

Sunakkhattaṃ sumaṅgalaṃ, supabhātaṃ suhuṭṭhitaṃ,

sukhaṇo sumuhutto ca, suyiṭṭhaṃ brahmacarisu.

 

Padakkhiṇaṃ kāyakammaṃ, vācākammaṃ padakkhiṇaṃ,

padakkhiṇaṃ manokammaṃ, paṇidhī te padakkhiṇā,

padakkhiṇāni katvāna, labhantatthe padakkhiṇe.

 

Sabbabuddhānubhāvena sabbadhammānubhāvena sabbasaṅghānubhāvena,

buddharatanaṃ dhammaratanaṃ saṅgharatanaṃ tiṇṇaṃ ratanānaṃ ānubhāvena,

caturāsītisahassadhammakkhandhānubhāvena piṭakattayānubhāvena janasāvakānubhāvena,

sabbe te rogā, sabbe te bhayā, sabbe te antarāyā, sabbe te upaddavā, sabbe te dunnimittā,

sabbe te avamaṅgalā vinassantu.

āyuvaḍḍhako dhanavaḍḍhako sirivaḍḍhako yasavaḍḍhako balavaḍḍhako vaṇṇavaḍḍhako sukhavaḍḍhako hotu sabbadā.

Dukkharogabhayā verā, sokā sattu cupaddavā,

anekā antarāyāpi, vinassantu ca tejasā.

Jayasiddhi dhanaṃ lābhaṃ, sotthi bhāgyaṃ sukhaṃ balaṃ,

siri āyu ca vaṇṇo ca, bhogaṃ vuḍḍhī ca yasavā,

satavassā ca āyū ca, jīvasiddhī bhavantu te.

 

Bhavatu sabbamaṅgalaṃ, rakkhantu sabbadevatā,

sabbabuddhānubhāvena, sada sotthī bhavantu te.

Bhavatu sabbamaṅgalaṃ, rakkhantu sabbadevatā,

sabbadhammānubhāvena, sada sotthī bhavantu te.

Bhavatu sabbamaṅgalaṃ, rakkhantu sabbadevatā,

sabbasaṅghānubhāvena, sada sotthī bhavantu te.

 

 

namo tassa bhagavato arahato sammāsambuddhassa.

namo tassa bhagavato arahato sammāsambuddhassa.

namo tassa bhagavato arahato sammāsambuddhassa.

 

Mātikā (Abhi. 34/1)

 

Kusalā dhammā akusalā dhammā abyākatā dhammā,

sukhāyavedanāyasampayuttā dhammā dukkhāyavedanāyasampayuttā dhammā

adukkhamasukhāyavedanāyasampayuttā dhammā,

vipākā dhammā vipākadhammadhammā nevavipākanavipākadhammadhammā,

upādinnupādāniyā dhammā anupādinnupādāniyā dhammā anupādinnānupādāniyā dhammā,

saṅkiliṭṭhasaṅkilesikā dhammā asaṅkiliṭṭhasaṅkilesikā dhammā asaṅkiliṭṭhāsaṅkilesikā dhammā,

savitakkasavicārā dhammā avitakkavicāramattā dhammā avitakkāvicārā dhammā,

pītisahagatā dhammā sukhasahagatā dhammā upekkhāsahagatā dhammā,

dassanenapahātabbā dhammā bhāvanāyapahātabbā dhammā nevadassanenanabhāvanāyapahātabbā dhammā,

dassanenapahātabbahetukā dhammā bhāvanāyapahātabbahetukā dhammā nevadassanenanabhāvanāyapahātabbahetukā dhammā,

ācayagāmino dhammā apacayagāmino dhammā nevācayagāminonāpacayagāmino dhammā,

sekkhā dhammā asekkhā dhammā nevasekkhānāsekkhā dhammā,

parittā dhammā mahaggatā dhammā appamāṇā dhammā,

parittārammaṇā dhammā mahaggatārammaṇā dhammā appamāṇārammaṇā dhammā,

hīnā dhammā majjhimā dhammā paṇītā dhammā,

micchattaniyatā dhammā sammattaniyatā dhammā aniyatā dhammā,

maggārammaṇā dhammā maggahetukā dhammā maggādhipatino dhammā,

uppannā dhammā anuppannā dhammā uppādino dhammā,

atītā dhammā anāgatā dhammā paccuppannā dhammā,

atītārammaṇā dhammā anāgatārammaṇā dhammā paccuppannārammaṇā dhammā,

ajjhattā dhammā bahiddhā dhammā ajjhattabahiddhā dhammā,

ajjhattārammaṇā dhammā bahiddhārammaṇā dhammā ajjhattabahiddhārammaṇā dhammā,

sanidassanasappaṭighā dhammā anidassanasappaṭighā dhammā anidassanāppaṭighā dhammā.

 

Paccaya 24 (Abhi. P. 40/1)

 

Hetupaccayo ārammaṇapaccayo adhipatipaccayo

anantarapaccayo samanantarapaccayo sahajātapaccayo

aññamaññapaccayo nissayapaccayo upanissayapaccayo

purejātapaccayo pacchājātapaccayo āsevanapaccayo

kammapaccayo vipākapaccayo āhārapaccayo

indriyapaccayo jhānapaccayo maggapaccayo

sampayuttapaccayo vippayuttapaccayo atthipaccayo

natthipaccayo vigatapaccayo avigatapaccayo.

 

Vipassanābhūmipāṭha

 

Pañcakkhandhā : rūpakkhandho vedanākkhandho saññākkhandho

saṅkhārakkhandho viññāṇakkhandho.

Dvādasāyatanāni : cakkhvāyatanaṃ rūpāyatanaṃ, sotāyatanaṃ saddhāyatanaṃ, ghānāyatanaṃ gandhāyatanaṃ, jivhāyatanaṃ rasāyatanaṃ, kāyāyatanaṃ phoṭṭhabbāyatanaṃ, manāyatanaṃ dhammāyatanaṃ.

aṭṭhārasa dhātuyo : cakkhudhātu rūpadhātu cakkuviññāṇadhātu, sotadhātu saddadhātu sotaviññāṇadhātu, ghānadhātu gandhadhātu ghānaviññāṇadhātu, jivhādhātu rasadhātu jivhāviññāṇadhātu, kāyadhātu phoṭṭhabbadhātu kāyaviññāṇadhātu, manodhātu dhammadhātu manoviññāṇadhātu.

Bāvīsatindriyāni : cakkhundriyaṃ sotindriyaṃ ghānindriyaṃ jivhindriyaṃ kāyindriyaṃ manindriyaṃ, itthindriyaṃ purisindriyaṃ jīvitindriyaṃ, sukhindriyaṃ dukkhindriyaṃ somanassindriyaṃ domanassindriyaṃ upekkhindriyaṃ, saddhindriyaṃ viriyindriyaṃ

satindriyaṃ samādhindriyaṃ paññindriyaṃ, anaṇaṇataññassāmītindriyaṃ aññindriyaṃ aññātāvindriyaṃ.

Cattāri ariyasaccāni : dukkhaṃ ariyasaccaṃ, dukkhasamudayo ariyasaccaṃ, dukkhanirodho ariyasaccaṃ, dukkhanirodhagāminī ariyasaccaṃ, .

 

Paṭiccasamuppāda (Vin. 4/1)

 

Avijjāpaccayā saṅkhārā, saṅkhārapaccayā viññāṇaṃ,

viññāṇapaccayā nāmarūpaṃ, nāmarūpapaccayā saḷāyatanaṃ,

saḷāyatanapaccayā phasso, phassapaccayā vedanā, vedanāpaccayā taṇhā,

taṇhāpaccayā upādānaṃ, upādānapaccayā bhavo, bhavapaccayā jāti,

jātipaccayā jarāmaraṇaṃ sokaparidevadukkhadomanassupāyāsā sambhavanti,

evametassa kevalassa dukkhakkhandhassa samudayo hoti.

 

Avijjāya tveva asesavirāganirodhā saṅkhāranirodho, saṅkhāranirodhā

viññāṇanirodho, viññāṇanirodhā nāmarūpanirodho, nāmarūpanirodhā

saḷāyatananirodho, saḷāyatananirodhā phassanirodho, phassanirodhā

vedanānirodho, vedanānirodhā taṇhānirodho, taṇhānirodhā upādānanirodho,

upādānanirodhā bhavanirodho, bhavanirodhā jātinirodho,

jātinirodhā jarāmaraṇaṃ sokaparidevadukkhadomanassupāyāsā nirujjhanti,

evametassa kevalassa dukkhakkhandhassa nirodho hotīti.

 

Karaṇīyamettasutta (Kh. Kh. 25/10)

 

Karaṇīyamatthakusalena, yantaṃ santaṃ padaṃ abhisamecca,
sakko ujū ca suhujū ca, suvaco cassa mudu anatimānī.

 

santussako ca subharo ca, appakicco ca sallahukavutti,

santindriyo ca nipako ca, appagabbho kulesu ananugiddho.

 

Na ca khuddaṃ samācare kiñci, yena viññū pare upavadeyyuṃ,

sukhino vā khemino hontu, sabbe sattā bhavantu sukhitattā.

 

yekeci pāṇabhūtatthi, tasā vā thāvarā vā anavasesā,

dīghā vā ye mahantā vā, majjhimā rassakā aṇukathūlā.

 

diṭṭhā vā ye ca adiṭṭhā, ye ca dūre vasanti avidūre,

bhūtā vā sambhavesī vā, sabbe sattā bhavantu sukhitattā.

 

na paro paraṃ nikubbetha, nātimaññetha katthaci naṃ kiñci,

byārosanā paṭīghasaññā, nāññamaññassa dukkhamiccheyya.

 

Mātā yathā niyaṃ puttaṃ, āyusā ekaputtamanurakkhe,

evampi sabbabhūtesu, mānasambhāvaye aparimāṇaṃ.

 

mettañca sabbalokasmiṃ, mānasambhāvaye aparimāṇaṃ,

uddhaṃ adho ca tiriyañca, asambādhaṃ averaṃ asapattaṃ.

 

tiṭṭhañcaraṃ nisinno vā, sayāno vā yāva tassa vigatamiddho,

etaṃ satiṃ adhiṭṭheyya, brahmametaṃ vihāraṃ idhamāhu.

 

diṭṭhiñca anupagamma, sīlavā dassanena sampanno,

kāmesu vineyya gedhaṃ, na hi jātu gabbhaseyyaṃ punaretīti.

 

Aniccā vata saṅkhārā, uppādavayadhammino,

uppajjitvā nirujjhanti, tesaṃ vūpasamo sukho.

 

Aniccā vata saṅkhārā, uppādavayadhammino,

uppajjitvā nirujjhanti, tesaṃ vūpasamo sukho.

 

Aniccā vata saṅkhārā, uppādavayadhammino,

uppajjitvā nirujjhanti, tesaṃ vūpasamo sukho.