Evening Chanting

 

 

Ratanattayapūjā

Arahaṃ sammā sambuddho bhagavā,

buddhaṃ bhagavantaṃ abhivādemi.

Svākkhāto bhagavatā dhammo,

dhammaṃ namassāmi.

Supaṭipanno bhagavato sāvakasaṅgho,

saṅghaṃ namāmi.

 


 

Pubbabhāganamakāra

(Handa mayaṃ buddhassa bhagavato pubbabhāganamakāraṃ karoma se.)

Namo tassa bhagavato arahato sammāsambuddhassa.

Namo tassa bhagavato arahato sammāsambuddhassa.

Namo tassa bhagavato arahato sammāsambuddhassa.

 

Buddhānussati

(Handa mayaṃ buddhānussatinayaṃ karoma se.)

Taṃ kho pana bhagavantaṃ evaṃ kalyāṇo kittisaddo abbhuggato,

itipi so bhagavā arahaṃ sammāsambuddho,

vijjācaraṇasampanno sugato lokavidū,

anuttaro purisadammasārathi,

satthā devamanussānaṃ buddho bhagavāti.

 

Buddhābhigīti

(Handa mayaṃ buddhābhigītiṃ karoma se)

Buddhavārahantavaratādiguṇābhiyutto,

suddhābhiñāṇakaruṇāhi samāgatatto,

bodhesi yo sujanataṃ kamalaṃva sūro,

vandāmahaṃ tamaraṇaṃ sirasā jinendaṃ.

Buddho yo sabbapānīnaṃ, saraṇaṃ khemamuttamaṃ,

paṭamānussatiṭṭhānaṃ, vandāmi taṃ sirenahaṃ.

Buddhassāhasmi dāso (dasī) va, buddho me sāmikissaro,

buddho dukkhassa ghātā ca, vidhātā ca hitassa me.

Buddhassāhaṃ niyyādemi, sarīrañjīvitañcidaṃ,

vandantohaṃ (tīhaṃ) carissāmi, buddhasseva subodhitaṃ.

Natthi me saraṇaṃ aññaṃ, buddho me saraṇaṃ varaṃ,

etena saccavajjena, vaḍḍheyyaṃ satthu sāsane.

Buddhaṃ me vandamānena (mānāya), yaṃ puññaṃ pasutaṃ idha,

sabbepi antarāyā me, māhesuṃ tassa tejasā.

Kāyena vācāya va cetasā vā,

buddhe kukammaṃ pakataṃ mayā yaṃ,

buddho paṭiggaṇhatu accayantaṃ,

kālantare saṃvarituṃva buddhe.

 

Dhammānussati

(Handa mayaṃ dhammānussatinayaṃ karoma se.)

Svākhāto bhagavatā dhammo,

sandiṭṭhiko akāliko,

ehipassiko opanayiko,

paccattaṃ veditabbo viññūhīti.

 

Dhammābhigīti

(Handa mayaṃ dhammābhigītiṃ karoma se)

Svākhātatādiguṇayogavasena seyyo,

yo maggapākapariyattivimokkhabhedo,

dhammo kulokapatanā tadadhāridhārī,

vandāmahaṃ tamaharaṃ varadhammametaṃ.

Dhammo yo sabbapānīnaṃ, saraṇaṃ khemamuttamaṃ,

dutiyānussatiṭṭhānaṃ, vandāmi taṃ sirenahaṃ.

Dhammassāhasmi dāso (dasī) va, dhammo me sāmikissaro,

dhammo dukkhassa ghātā ca, vidhātā ca hitassa me.

Dhammassāhaṃ niyyādemi, sarīrañjīvitañcidaṃ,

vandantohaṃ (tīhaṃ) carissāmi, dhammasseva sudhammataṃ.

Natthi me saraṇaṃ aññaṃ, dhammo me saraṇaṃ varaṃ,

etena saccavajjena, vaḍḍheyyaṃ satthu sāsane.

Dhammaṃ me vandamānena (mānāya), yaṃ puññaṃ pasutaṃ idha,

sabbepi antarāyā me, māhesuṃ tassa tejasā.

Kāyena vācāya va cetasā vā,

dhamme kukammaṃ pakataṃ mayā yaṃ,

dhammo paṭiggaṇhatu accayantaṃ,

kālantare saṃvarituṃva dhamme.

 

Saṅghānussati

(Handa mayaṃ saṅgānussatinayaṃ karoma se.)

Supaṭipanno bhagavato sāvakasaṅgho,

ujupaṭipanno bhagavato sāvakasaṅgho,

ñāyapaṭipanno bhagavato sāvakasaṅgho,

sāmīcipaṭipanno bhagavato sāvakasaṅgho,

yadidaṃ cattari purisayugāni aṭṭha purisapuggalā,

esa bhagavato sāvakasaṅgho,

āhuneyyo pāhuneyyo,

dakkhiṇeyyo añjalikaraṇīyo,

anuttaraṃ puññakkhettaṃ lokassāti.

 

Saṅghābhigīti

(Handa mayaṃ saṅghābhigītiṃ karoma se)

Saddhammajo supaṭipattiguṇādiyutto,

yoṭṭhabbidho ariyapuggalasaṅghaseṭṭho,

sīlādidhammapavarāsayakāyacitto,

vandāmahaṃ tamariyāna gaṇaṃ susuddhaṃ.

Saṅgho yo sabbapānīnaṃ, saraṇaṃ khemamuttamaṃ,

tatiyānussatiṭṭhānaṃ, vandāmi taṃ sirenahaṃ.

Saṅghassāhasmi dāso (dasī) va, saṅgho me sāmikissaro,

saṅgho dukkhassa ghātā ca, vidhātā ca hitassa me.

Saṅghassāhaṃ niyyādemi, sarīrañjīvitañcidaṃ,

vandantohaṃ (tīhaṃ) carissāmi, saṅghassopaṭipannataṃ.

Natthi me saraṇaṃ aññaṃ, saṅgho me saraṇaṃ varaṃ,

etena saccavajjena, vaḍḍheyyaṃ satthu sāsane.

Saṅghaṃ me vandamānena (mānāya), yaṃ puññaṃ pasutaṃ idha,

sabbepi antarāyā me, māhesuṃ tassa tejasā.

Kāyena vācāya va cetasā vā,

saṅghe kukammaṃ pakataṃ mayā yaṃ,

saṅgho paṭiggaṇhatu accayantaṃ,

kālantare saṃvarituṃva saṅghe.

 

Uddisanādhiṭṭhānagāthā

(Handa mayaṃ uddisanādhiṭṭhānagāthāyo bhaṇāma se)

Iminā puññakammene, upajjhāyā guṇuttarā,

ācariyūpakārā ca, mātā pitā ca ñātakā.

Suriyo candimā rājā, guṇavantā narāpi ca,

brahmamārā ca indā ca, lokapālā ca devatā,

yamo mittā manussā ca, majjhattā verikāpi ca.

Sabbe sattā sukhī hontu, puññāni pakatāni me,

sukhaṃ ca tividham dentu, khippaṃ pāpetha vo mataṃ.

 

Iminā puññakammene, iminā uddisena ca,

khippāhaṃ sulabhe ceva, taṇhupādānachedanaṃ.

Ye santāne hinā dhammā, yāva nibbānato mamaṃ,

nassantu sabbadā yeva, yattha jāto bhave bhave.

Ujucittaṃ satipaññā, sallekho viriyamhinā,

mārā labhantu nokāsaṃ, kātuñca viriyesu me.

Buddhādipavaro nātho, dhammo nātho varuttamo,

nātho paccekabuddho ca, saṅgho nāthottaro mamaṃ,

Tesottamānubhāvena, mārokāsaṃ labhantu mā.

 

 

 

 

 

 

 

Evening Chanting