Abhayagiri Buddhist Monastery  Redwood Valley, CA 95470, USA

www.abhayagiri.org 

 

DHAMMACAKKAPPAVATTANA SUTTA

 

(Solo Introduction:)

 

Anuttaraṃ abhisambodhiṃ, sambujjhitvā tathāgato,

paṭhamaṃ yaṃ adesesi, dhammacakkaṃ anuttaraṃ.

 

Sammadeva pavattento, loke appativattiyaṃ,

yatthākkhātā ubho antā, paṭipatti ca majjhimā.

 

Catūsvāriyasaccesu, visuddhaṃ ñāṇadassanaṃ,

desitaṃ, dhammarājena, sammāsambodhikittanaṃ.

 

Nāmena vissutaṃ suttaṃ, Dhammacakkappavattanaṃ,

veyyākaraṇapāṭhena, saṅgīta tambhaāma se.

 

Dhammacakkappavattanavaggo dutiyo (Vin. 4/13)

 

[1] Evamme sutaṃ : ekaṃ samayaṃ bhagavā bārāṇasiyaṃ viharati

isipatane migadāye. Tatra kho bhagavā pañcavaggiye bhikkhū āmantesi:

dveme bhikkhave antā pabbajitena na sevitabbā.

Yo cāyaṃ kāmesu kāmasukhallikānuyogo hīno gammo pothujjaniko

anariyo anatthasañhito; yo cāyaṃ attakilamathānuyogo dukkho

anariyo anatthasañhito.

 

Etete bhikkhave ubho ante anupagamma majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati.

Katamā ca sā bhikkhave majjhimā paṭipadā tathāgatena abhisambuddhā cakkhukaraṇī

ñāṇakaraṇī upasamāya abhiññāya sambodhāya nibbānāya saṃvattati.

Ayameva ariyo aṭṭhaṅgiko maggo. Seyyathīdaṃ. Sammādiṭṭhi sammāsaṅkappo

sammāvācā sammākammanto sammā-ājīvo sammāvāyāmo sammāsati sammāsamādhi.

 

Ayaṃ kho sā bhikkhave majjhimā paṭipadā tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati.

 

[2] Idaṃ kho pana bhikkhave dukkhaṃ ariyasaccaṃ.

Jātipi dukkhā, jarāpi dukkhā, maraṇampi dukkhaṃ, sokaparidevadukkhadomanassupāyāsāpi dukkhā, appiyehi sampayogo dukkho, piyehi vippayogo dukkho, yampicchaṃ na labhati tampi dukkhaṃ, saṅkhittena pañcupādānakkhandhā dukkhā.

 

Idaṃ kho pana bhikkhave dukkhasamudayo ariyasaccaṃ.

Yāyaṃ taṇhā ponobbhavikā nandirāgasahagatā tatratatrābhinandinī.

Seyyathīdaṃ. Kāmataṇhā bhavataṇhā vibhavataṇhā.

 

Idaṃ kho pana bhikkhave dukkhanirodho ariyasaccaṃ.

Yo tassā yeva taṇhāya asesavirāganirodho cāgo paṭinissaggo mutti anālayo.

 

Idaṃ kho pana bhikkhave dukkhanirodhagāminīpaṭipadā ariyasaccaṃ.

Ayameva ariyo aṭṭhaṅgiko maggo. Seyyathīdaṃ. Sammādiṭṭhi sammāsaṅkappo

sammāvācā sammākammanto sammā-ājīvo sammāvāyāmo sammāsati sammāsamādhi.

 

[3] Idaṃ dukkhaṃ ariyasaccanti me bhikkhave pubbe ananussutesu dhammesu,

cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

Taṃ kho panidaṃ dukkhaṃ ariyasaccaṃ pariññeyyanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

Taṃ kho panidaṃ dukkhaṃ ariyasaccaṃ Pariññātanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

[4] Idaṃ dukkhasamudayo ariyasaccanti me bhikkhave pubbe ananussutesu dhammesu, cakkhuṃ udapādi ñāṇaṃ udapādi paññā udapādi vijjā udapādi āloko udapādi.

 

Taṃ kho panidaṃ dukkhasamudayo ariyasaccaṃ pahātabbanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

Taṃ kho panidaṃ dukkhasamudayo ariyasaccaṃ Pahīnanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

[5] Idaṃ dukkhanirodho ariyasaccanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

Taṃ kho panidaṃ dukkhanirodho ariyasaccaṃ sacchikātabbanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

Taṃ kho panidaṃ dukkhanirodho ariyasaccaṃ sacchikatanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

[6] Idaṃ dukkhanirodhagāminīpaṭipadā ariyasaccanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

Taṃ kho panidaṃ dukkhanirodhagāminīpaṭipadā ariyasaccaṃ bhāvetabbanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

Taṃ kho panidaṃ dukkhanirodhagāminīpaṭipadā ariyasaccaṃ bhāvitanti me bhikkhave pubbe ananussutesu dhammesu, cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.

 

[7] Yāvakīvañca me bhikkhave imesu catūsu ariyasaccesu evantiparivaṭṭaṃ dvādasākāraṃ yathābhūtaṃ ñāṇadassanaṃ na suvisuddhaṃ ahosi, neva tāvāhaṃ bhikkhave sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddho paccaññāsiṃ.

 

Yato ca kho me bhikkhave imesu catūsu ariyasaccesu evantiparivaṭṭaṃ dvādasākāraṃ yathābhūtaṃ ñāṇadassanaṃ suvisuddhaṃ ahosi, athāhaṃ bhikkhave sadevake loke samārake sabrahmake

sassamaṇabrāhmaṇiyā pajāya sadevamanussāya anuttaraṃ sammāsambodhiṃ

abhisambuddho paccaññāsiṃ.

 

Ñāṇañca pana me dassanaṃ udapādi, akuppā me vimutti ayamantimā jāti, natthidāni punabbhavoti.

Idamavoca bhagavā. Attamanā pañcavaggiyā bhikkhū bhagavato bhāsitaṃ abhinandunti.

 

[8] Imasmiñca pana veyyākaraṇasmiṃ bhaññamāne āyasmato koṇḍaññassa virajaṃ vītamalaṃ dhammacakkhuṃ udapādi, „yaṅkiñci samudayadhammaṃ sabbantaṃ nirodhadhammanti“.

 

Pavattite ca bhagavatā dhammacakke bhummā devā saddamanussāvesuṃ:

etaṃ bhagavatā bārāṇasiyaṃ isipatane migadāye anuttaraṃ dhammacakkaṃ pavattitaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā

lokasminti.

 

Bhummānaṃ devānaṃ saddaṃ sutvā Cātummahārājikā devā saddamanussāvesuṃ;

Cātummahārājikānaṃ devānaṃ saddaṃ sutvā Tāvatiṃsā devā saddamanussāvesuṃ;

Tāvatitiṃsānaṃ devānaṃ saddaṃ sutvā Yāmā devā saddamanussāvesuṃ;

Yāmānaṃ devānaṃ saddaṃ sutvā Tusitā devā saddamanussāvesuṃ;

Tusitānaṃ devānaṃ saddaṃ sutvā Nimmānaratī devā saddamanussāvesuṃ;

Nimmāratīnaṃ devānaṃ saddaṃ sutvā Paranimmitavasavattī devā saddamanussāvesuṃ;

Paranimmitavasavattīnaṃ devānaṃ saddaṃ sutvā Brahmakāyikā devā saddamanussāvesuṃ,

etaṃ bhagavatā bārāṇasiyaṃ isipatane migadāye anuttaraṃ dhammacakkaṃ pavattitaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasminti.

 

[9] Itiha tena khaṇena tena muhuttena yāva brahmalokā saddo abbhuggacchi.

Ayañca dasasahassī lokadhātu saṅkampi sampakampi sampavedhi.

Appamāṇo ca oḷāro obhāso loke pāturahosi atikkammeva devānaṃ devānubhāvaṃ.

 

[10] Atha kho bhagavā udānaṃ udānesi:

aññāsi vata bho koṇḍañño, aññāsi vata bho koṇḍañño“ti.

Iti hidaṃ āyasmato koṇḍaññassa aññākoṇḍaññotveva nāmaṃ ahosīti.

 

Dhammacakkappavattanasuttaṃ niṭṭhitaṃ.

 

 

ANATTALAKKHAṆA SUTTA (Vin. 4/20)

 

(Solo Introduction:)

 

Yantaṃ sattehi dukkhena, ñeyyaṃ anattalakkhaṇaṃ,

attavādāttasaññānaṃ, sammadeva vimocanaṃ.

 

Sambuddho taṃ pakāsesi, diṭṭhasaccāna yoginaṃ,

uttariṃ paṭivedhāya, bhāvetuṃ ñāṇamuttamaṃ.

 

Yantesaṃ diṭṭhadhammānaṃ, ñāṇenupaparikkhataṃ,

sabbāsavehi cittāni, vimucciṃsu asesato.

 

Tathā ñāṇānusārena, sāsanaṃ kātumicchataṃ,

sādhūnaṃ atthasiddhatthaṃ, taṃ suttantaṃ bhaṇāma se.

 

[1] Evamme sutaṃ, ekaṃ samayaṃ bhagavā bārāṇasiyaṃ viharati

isipatane migadāye. Tatra kho bhagavā pañcavaggiye bhikkhū āmantesi :

rūpaṃ bhikkhave anattā.

rūpañca hidaṃ bhikkhave attā abhavissa, nayidaṃ rūpaṃ ābādhāya saṃvatteyya,

labbhetha ca rūpe, evaṃ me rūpaṃ hotu, evaṃ me rūpaṃ mā ahosīti.

Yasmā ca kho bhikkhave rūpaṃ anattā, tasmā rūpaṃ ābādhāya saṃvattati,

na ca labbhati rūpe, evaṃ me rūpaṃ hotu, evaṃ me rūpaṃ mā ahosīti.

 

Vedanā anattā.

Vedanā ca hidaṃ bhikkhave attā abhavissa nayidaṃ vedanā ābādhāya saṃvatteyya,

labbhetha ca vedanāya evaṃ me vedanā hotu evaṃ me vedanā mā ahosīti.

Yasmā ca kho bhikkhave vedanā anattā tasmā vedanā ābādhāya saṃvattati na ca labbhati vedanāya evaṃ me vedanā hotu evaṃ me vedanā mā ahosīti.

 

Saññā anattā.

Saññā ca hidaṃ bhikkhave attā abhavissa nayidaṃ saññā ābādhāya saṃvatteyya,

labbhetha ca saññāya evaṃ me saññā hotu evaṃ me saññā mā ahosīti.

Yasmā ca kho bhikkhave saññā anattā tasmā saññā ābādhāya saṃvattati,

na ca labbhati saññāya evaṃ me saññā hotu evaṃ me saññā mā ahosīti.

 

Saṅkhārā anattā.

Saṅkhārā ca hidaṃ bhikkhave attā abhavissaṃsu, nayidaṃ saṅkhārā ābādhāya saṃvatteyyuṃ, labbhetha ca saṅkhāresu evaṃ me saṅkhārā hontu evaṃ me saṅkhārā mā ahesunti.

Yasmā ca kho bhikkhave saṅkhārā anattā tasmā saṅkhārā ābādhāya saṃvattanti,

na ca labbhati saṅkhāresu evaṃ me saṅkhārā hontu evaṃ me saṅkhārā mā ahesunti.

 

Viññāṇaṃ anattā.

Viññāṇañca hidaṃ bhikkhave attā abhavissa, nayidaṃ viññāṇaṃ ābādhāya saṃvatteyya,

labbhetha ca viññāṇe evaṃ me viññāṇaṃ hotu evaṃ me viññāṇaṃ mā ahosīti.

Yasmā ca kho bhikkhave viññāṇaṃ anattā tasmā viññāṇaṃ ābādhāya saṃvattati,

na ca labbhati viññāṇe evaṃ me viññāṇaṃ hotu evaṃ me viññāṇaṃ mā ahosīti.

 

[2] Taṃ kiṃ maññatha bhikkhave rūpaṃ niccaṃ vā aniccaṃ vāti.

Aniccaṃ bhante.

Yaṃ panāniccaṃ dukkhaṃ vā taṃ sukhaṃ vāti.

Dukkhaṃ bhante.

Yaṃ panāniccaṃ dukkhaṃ vipariṇāmadhammaṃ

kallaṃ nu taṃ

samanupassituṃ, etaṃ mama esohamasmi eso me attāti.

No hetaṃ bhante.

 

Vedanā niccā vā aniccā vāti.

Aniccā bhante.

Yaṃ panāniccaṃ dukkhaṃ vā taṃ sukhaṃ vāti.

Dukkhaṃ bhante.

Yaṃ panāniccaṃ dukkhaṃ vipariṇāmadhammaṃ kallaṃ nu taṃ samanupassituṃ,

etaṃ mama esohamasmi eso me attāti.

No hetaṃ bhante.

 

Saññā niccā vā aniccā vāti.

Aniccā bhante.

Yaṃ panāniccaṃ dukkhaṃ vā taṃ sukhaṃ vāti.

Dukkhaṃ bhante.

Yaṃ panāniccaṃ dukkhaṃ vipariṇāmadhammaṃ kallaṃ nu taṃ samanupassituṃ,

etaṃ mama esohamasmi eso me attāti.

No hetaṃ bhante.

 

Saṅkhārā niccā vā aniccā vāti.

Aniccā bhante.

Yaṃ panāniccaṃ dukkhaṃ vā taṃ sukhaṃ vāti.

Dukkhaṃ bhante.

Yaṃ panāniccaṃ dukkhaṃ vipariṇāmadhammaṃ kallaṃ nu taṃ samanupassituṃ,

etaṃ mama esohamasmi eso me attāti.

No hetaṃ bhante.

 

Viññāṇaṃ niccaṃ vā aniccaṃ vāti.

Aniccaṃ bhante.

Yaṃ panāniccaṃ dukkhaṃ vā taṃ sukhaṃ vāti.

Dukkhaṃ bhante.

Yaṃ panāniccaṃ dukkhaṃ vipariṇāmadhammaṃ kallaṃ nu taṃ samanupassituṃ,

etaṃ mama esohamasmi eso me attāti.

No hetaṃ bhante.

 

[3] Tasmātiha bhikkhave yaṅkiñci rūpaṃ atītānāgatapaccuppannaṃ

ajjhattaṃ vā bahiddhā vā oḷārikaṃ vā sukhumaṃ vā

hīnaṃ vā paṇītaṃ vā yaṃ dūre vā santike vā,

sabbaṃ rūpaṃ netaṃ mama nesohamasmi na meso attāti

evametaṃ yathābhūtaṃ sammappaññāya daṭṭhabbaṃ.

 

Yā kāci vedanā atītānāgatapaccuppannā ajjhattā vā bahiddhā vā

oḷārikā vā sukhumā vā hīnā vā paṇītā vā yā dūre vā santike vā,

sabbā vedanā netaṃ mama nesohamasmi na meso attāti,

evametaṃ yathābhūtaṃ sammappaññāya daṭṭhabbaṃ.

 

Yā kāci saññā atītānāgatapaccuppannā ajjhattā vā bahiddhā vā

oḷārikā vā sukhumā vā hīnā vā paṇītā vā yā dūre vā santike vā,

sabbā saññā netaṃ mama nesohamasmi na meso attāti,

evametaṃ yathābhūtaṃ sammappaññāya daṭṭhabbaṃ.

 

Ye keci saṅkhārā atītānāgatapaccuppannā ajjhattā vā bahiddhā vā

oḷārikā vā sukhumā vā hīnā vā paṇītā vā ye dūre vā santike vā,

sabbe saṅkhārā netaṃ mama nesohamasmi na meso attāti,

evametaṃ yathābhūtaṃ sammappaññāya daṭṭhabbaṃ.

 

Yaṅkiñci viññāṇaṃ atītānāgatapaccuppannaṃ ajjhattaṃ vā bahiddhā vā

oḷārikaṃ vā sukhumaṃ vā hīnaṃ vā paṇītaṃ vā yaṃ dūre vā santike vā,

sabbaṃ viññāṇaṃ netaṃ mama nesohamasmi na meso attāti,

evametaṃ yathābhūtaṃ sammappaññāya daṭṭhabbaṃ.

 

[4] Evaṃ passaṃ bhikkhave sutavā ariyasāvako rūpasmiṃpi

nibbindati, vedanāyapi nibbindati, saññāyapi nibbindati, saṅkhāresupi

nibbindati, viññāṇasmiṃpi nibbindati, nibbindaṃ virajjati, virāgā

vimuccati, vimuttasmiṃ vimuttamiti, ñāṇaṃ hoti, khīṇā jāti, vusitaṃ

brahmacariyaṃ, kataṃ karaṇīyaṃ, nāparaṃ itthattāyāti pajānātīti.

 

[5] Idamavoca bhagavā. Attamanā pañcavaggiyā bhikkhū bhagavato

bhāsitaṃ abhinanduṃ. Imasmiṃ ca pana veyyākaraṇasmiṃ bhaññamāne

pañcavaggiyānaṃ bhikkhūnaṃ anupādāya āsavehi cittāni vimucciṃsu.

Tena kho pana samayena cha loke arahanto honti.

Lakkhaṇasuttaṃ niṭṭhitaṃ.

 

 

Ādittapariyāyasutta (Vin. 4/55)

 

Veneyyadamanopāye, sabbaso pāramiṃ gato,

amoghavacano buddho, abiññāyānusāsako.

 

Ciṇṇānurūpato cāpi, dhammena vinayaṃ pajaṃ,

ciṇṇāggipāricariyānaṃ, sambojjhārahayoginaṃ.

 

Yamādittapariyāyaṃ, desayanto manoharaṃ,

te sotāro vimocesi, asekkhāya vimuttiyā.

 

Tathevopaparikkhāya, viññūnaṃ sotumicchataṃ,

dukkhatālakkhaṇopāyaṃ, taṃ suttantaṃ bhaṇāma se.

 

 

Evamme sutaṃ, ekaṃ samayaṃ bhagavā gayāyaṃ viharati gayāsīse saddhiṃ bhikkhusahassena.

Tatra kho bhagavā bhikkhū āmantesi.

sabbaṃ bhikkhave ādittaṃ, kiñca bhikkhave sabbaṃ ādittaṃ,

cakkhuṃ bhikkhave ādittaṃ, rūpā ādittā, cakkhuviññāṇaṃ ādittaṃ,

cakkhusamphasso āditto, yampidaṃ cakkhusamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ, kena

ādittaṃ, ādittaṃ rāgagginā dosagginā mohagginā, ādittaṃ jātiyā jarāmaraṇena

sokehi paridevehi dukkhehi domanassehi upāyāsehi, ādittanti vadāmi.

 

Sotaṃ ādittaṃ saddā ādittā sotaviññāṇaṃ ādittaṃ,

sotasamphasso āditto, yampidaṃ sotasamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ, kena

ādittaṃ, ādittaṃ rāgagginā dosagginā mohagginā, ādittaṃ jātiyā jarāmaraṇena

sokehi paridevehi dukkhehi domanassehi upāyāsehi, ādittanti vadāmi.

 

Ghānaṃ ādittaṃ gandhā ādittā ghānaviññāṇaṃ ādittaṃ,

ghānasamphasso āditto, yampidaṃ ghānasamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ, kena

ādittaṃ, ādittaṃ rāgagginā dosagginā mohagginā, ādittaṃ jātiyā jarāmaraṇena

sokehi paridevehi dukkhehi domanassehi upāyāsehi, ādittanti vadāmi.

 

Jivhā ādittā rasā ādittā jivhāviññāṇaṃ ādittaṃ,

jivhāsamphasso āditto, yampidaṃ jivhāsamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ, kena

ādittaṃ, ādittaṃ rāgagginā dosagginā mohagginā, ādittaṃ jātiyā jarāmaraṇena

sokehi paridevehi dukkhehi domanassehi upāyāsehi, ādittanti vadāmi.

 

Kāyo āditto phoṭṭhabbā ādittā kāyaviññāṇaṃ ādittaṃ,

kāyasamphasso āditto, yampidaṃ kāyasamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tampi ādittaṃ, kena

ādittaṃ, ādittaṃ rāgagginā dosagginā mohagginā, ādittaṃ jātiyā jarāmaraṇena

sokehi paridevehi dukkhehi domanassehi upāyāsehi, ādittanti vadāmi.

 

Mano āditto, dhammā ādittā, manoviññāṇaṃ ādittaṃ, manosamphasso

āditto, yampidaṃ manosamphassapaccayā uppajjati vedayitaṃ sukhaṃ vā

dukkhaṃ vā adukkhamasukhaṃ vā, tampi ādittaṃ, kena ādittaṃ, ādittaṃ

rāgagginā dosagginā mohagginā, ādittaṃ jātiyā jarāmaraṇena sokehi paridevehi

dukkhehi domanassehi upāyāsehi, ādittanti vadāmi.

 

Evaṃ passaṃ bhikkhave sutavā ariyasāvako,

cakkhusmiṃpi nibbindati, rūpesupi nibbindati, cakkhuviññāṇepi nibbindati, cakkhusamphassepi nibbindati, yampidaṃ cakkhusamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tasmiṃpi nibbindati.

 

Sotasmiṃpi nibbindati, saddesupi nibbindati, sotaviññāṇepi nibbindati,

sotasamphassepi nibbindati, yampidaṃ sotasamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tasmiṃpi nibbindati.

 

Ghānasmiṃpi nibbindati gandhesupi nibbindati ghānaviññāṇepi nibbindati, ghānasamphassepi nibbindati, yampidaṃ ghānasamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tasmiṃpi nibbindati.

 

Jivhāyapi nibbindati rasesupi nibbindati jivhāviññāṇepi nibbindati, jivhāsamphassepi nibbindati, yampidaṃ jivhāsamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tasmiṃpi nibbindati.

 

Kāyasmiṃpi nibbindati phoṭṭhabbesupi nibbindati kāyaviññāṇepi nibbindati, kāyasamphassepi nibbindati, yampidaṃ kāyasamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tasmiṃpi nibbindati.

 

Manasmiṃpi nibbindati ,dhammesupi nibbindati, manoviññāṇepi nibbindati,

manosamphassepi nibbindati, yampidaṃ manosamphassapaccayā uppajjati

vedayitaṃ sukhaṃ vā dukkhaṃ vā adukkhamasukhaṃ vā, tasmiṃpi nibbindati.

 

nibbindaṃ virajjati, virāgā vimuccati, vimuttasmiṃ vimuttamiti ñāṇaṃ hoti, khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānātīti.

 

Imasmiṃ ca pana veyyākaraṇasmiṃ bhaññamāne, tassa bhikkhusahassassa anupādāya āsavehi cittāni vimucciṃsu.

 

Ādittapariyāyaṃ niṭṭhitaṃ.

 

 

 

ĀṬĀNĀṬIYA PARITTA (D. 11/207)

 

(Solo Introduction:)

 

Appasannehi nāthassa, sāsane sādhusammate

amanussehi caṇḍehi, sadā kibbisakāribhi.

 

Parisānaṃ catassannaṃ, ahiṃsāya ca guttiyā,

yaṃ desesi mahāvīro, parittantam bhama se.

 

 

Namo me sabbabuddhānaṃ, uppannānaṃ mahesinaṃ,

Taṇhaṅkaro mahāvīro, Medhaṅkaro mahāyaso.

 

Saraṇaṅkaro lokahito, Dīpaṅkaro jutindharo,

Koṇṇaññao janapāmokkho, Maṅgalo purisāsabho.

 

Sumano sumano dhīro, Revato rativaḍḍhano,

Sobhito guṇasampanno, Anomadassī januttamo.

 

Padumo lokapajjoto, Nārado varasārathī,

Padumuttaro sattasāro, Sumedho appaṭipuggalo.

 

Sujāto sabbalokaggo, Piyadassī narāsabho,

Atthadassī kāruṇiko, Dhammadassī tamonudo.

 

Siddhattho asamo loke, Tisso ca vadataṃ varo,

Phusso ca varado Buddho, Vipassī ca anūpamo.

 

Sikhī sabbahito satthā, Vessabhū sukhadāyako,

Kakusandho satthavāho, Kogamano raṇañjaho,

Kassapo sirisampanno, Gotamo sakyapuṅgavo.

 

 

Ete caññe ca sambuddhā, anekasatakoṭiyo,

sabbe buddhā asamasamā, sabbe buddhā mahiddhikā.

 

Sabbe dasabalūpetā, vesārajjehupāgatā,

sabbe te paṭijānanti, āsabhaṇṭānamuttamaṃ.

 

Sīhanādaṃ nadante te, parisāsu visāradā,

brahmacakkaṃ pavattenti, loke appaṭivattiyaṃ.

 

Upetā buddhadhammehi, aṭṭhārasahi nāyakā,

dvattiṃsalakkhaṇūpetā-, sityānubyañjanādharā.

 

Byāmappabhāya suppabhā, sabbe te munikuñjarā,

buddhā sabbaññuno ete, sabbe khīṇāsavā jinā.

 

Mahappabhā mahātejā, mahāpaññā mahabbalā,

mahākāruṇikā dhīrā, sabbesānaṃ sukhāvahā.

 

Dīpā nāthā patiṭṭhā ca, tāṇā leṇā ca paṇinaṃ,

gatī bandhū mahassāsā, saraṇā ca hitesino.

 

Sadevakassa lokassa, sabbe ete parāyanā,

tesāhaṃ sirasā pāde, vandāmi purisuttame.

 

Vacasā manasā ceva, vandāmete tathāgate,

sayane āsane ṭāne, gamane cāpi sabbadā.

 

Sadā sukhene rakkhantu, buddhā santikarā tuvaṃ,

tehi tvaṃ rakkhito santo, mutto sabbabhayena ca.

 

sabbarogavinimutto, sabbasantāpavajjito,

sabbaveramatikkanto, nibbuto ca tuvaṃ bhava.

 

Tesaṃ saccena sīlena, khantimettābalena ca,

tepi tumhenurakkhantu, arogena sukhena ca.

 

Puratthimasmiṃ disābhāge, santi bhūtā mahiddhikā,

tepi tumhenurakkhantu, arogena sukhena ca.

 

Dakkhiṇasmiṃ disābhāge, santi devā mahiddhikā,

tepi tumhenurakkhantu, arogena sukhena ca.

 

Pacchimasmiṃ disābhāge, santi nāgā mahiddhikā,

tepi tumhenurakkhantu, arogena sukhena ca.

 

Uttarasmiṃ disābhāge, santi yakkhā mahiddhikā,

tepi tumhenurakkhantu, arogena sukhena ca.

 

Purimadisaṃ dhataraṭṭho, dakkhiṇene viruḷhako,

pacchimena virūpakkho, kuvero uttaraṃ disaṃ.

 

Cattāro te mahārājā, lokapālā yasassino,

tepi tumhenurakkhantu, arogena sukhena ca.

 

ākāsaṭṭhā ca bhummaṭṭhā, devā nāgā mahiddhikā,

tepi tumhenurakkhantu, arogena sukhena ca.

 

Natthi me saraṇaṃ aññaṃ, Buddho me saraṇaṃ varaṃ,

etena saccavajjena, hotu te jayamaṅgalaṃ.

 

Natthi me saraṇaṃ aññaṃ, Dhammo me saraṇaṃ varaṃ,

etena saccavajjena, hotu te jayamaṅgalaṃ.

 

Natthi me saraṇaṃ aññaṃ, Saṅgho me saraṇaṃ varaṃ,

etena saccavajjena, hotu te jayamaṅgalaṃ.

 

Yaṅkiñci ratanaṃ loke, vijjati vividhaṃ puthu,

ratanaṃ Buddhasamaṃ natthi, tasmā sotthī bhavantu te.

 

Yaṅkiñci ratanaṃ loke, vijjati vividhaṃ puthu,

ratanaṃ Dhammasamaṃ natthi, tasmā sotthī bhavantu te.

 

Yaṅkiñci ratanaṃ loke, vijjati vividhaṃ puthu,

ratanaṃ Saṅghasamaṃ natthi, tasmā sotthī bhavantu te.

 

Sakkatvā Buddharatanaṃ, osathaṃ uttamaṃ varaṃ,

hitaṃ devamanussānaṃ, Buddhatejena sotthinā,

nassantupaddavā sabbe, dukkhā vūpasamentu te.

 

Sakkatvā Dhammaratanaṃ, osathaṃ uttamaṃ varaṃ,

pariḷāhūpasamanaṃ, Dhammatejena sotthinā,

nassantupaddavā sabbe, bhayā vūpasamentu te.

 

Sakkatvā Saṅgharatanṃ, osathaṃ uttamaṃ varaṃ,

āhuneyyaṃ pāhuneyyaṃ, Saṅghatejena sotthinā,

nassantupaddavā sabbe, rogā vūpasamentu te.

 

Sabbītiyo vivajjantu, sabbarogo vinassatu,

mā te bhavat-vantaryo, sukhī dīghāyuko bhava.

 

Abhivādanasīlissa, niccaṃ vuḍḍhāpacāyino,

cattāro dhammā vaḍḍhanti, āyu vaṇṇo sukhaṃ balaṃ.