Dhammacakkappavattanasutta

 

  1. Idaṃ kho pana bhikkhave dukkhaṃ ariyasaccaṃ, jātipi dukkhā, jarāpi dukkhā, byādhīpi dukkhā, maraṇaṃpi dhukkhaṃ, appiyehi sampayogo dukkho, piyehi vippayogo dukkho, yampicchaṃ no labhati, tampi dukkhaṃ, saṅkhittena pañcupādānakkhandhā dukkhā. (Idaṃ kho pana bhikkhave)

 

  1. Idaṃ kho pana bhikkhave dukkhasamudayo ariyasaccaṃ, yāyaṃ taṇhā ponobbhavikā nandirāgasahagatā tatratatrābhinandinī, seyyathīdaṃ, kāmataṇhā bhavataṇhā vibhavataṇhā. (Idaṃ kho pana bhikkhave)

 

  1. Idaṃ kho pana bhikkhave dukkhanirodho ariyasaccaṃ, yo tassāyeva taṇhāya, asesavirāganirodho cāgo paṭinissaggo mutti anālayo. (Idaṃ kho pana bhikkhave)

     

  2. Idaṃ kho pana bhikkhave dukkhanirodhagāminī paṭipadā ariyasaccaṃ, ayameva ariyo aṭṭhaṅgiko maggo, seyyathīdaṃ, sammādiṭṭhi sammāsaṅkappo, sammāvācā sammākammanto, sammā-ājīvo sammāvāyāmo, sammāsati sammāsamādhi.

 

 

Mettabhavana

 

Ahaṃ avero homi, abyāpajjho homi, anīgho homi, sukhī attānaṃ pariharāmi.

 

Mama mātāpitu, ācariyūpajjhā ca ñātimittā ca sabrahmacārino ca,

everā hontu, abyāpajjhā hontu, anīghā hontu, sukhī attānaṃ pariharantu.

 

Imasmiṃ ārāme sabbe yogino,

everā hontu, abyāpajjhā hontu, anīghā hontu, sukhī attānaṃ pariharantu.

 

Imasmiṃ ārāme sabbe bhikkhū sāmaṇerā ca upāsakā upāsikāyo ca,

everā hontu, abyāpajjhā hontu, anīghā hontu, sukhī attānaṃ pariharantu.

 

Amhākaṃ catupaccayadāyakā,

everā hontu, abyāpajjhā hontu, anīghā hontu, sukhī attānaṃ pariharantu.

 

Amhākaṃ ārakkhā devatā, imasmiṃ vihāre, imasmiṃ āvāse, imasmiṃ ārame, ārakkhā devatā,

everā hontu, abyāpajjhā hontu, anīghā hontu, sukhī attānaṃ pariharantu.

 

Sabbe sattā, sabbe pāṇā, sabbe bhūtā, sabbe puggalā, sabbe attabhāvapariyāpannā, sabbā itthiyo, sabbe purisā, sabbe ariyā, sabbe anariyā, sabbe devā, sabbe manussā, sabbe vinipātikā,

everā hontu, abyāpajjhā hontu, anīghā hontu, sukhī attānaṃ pariharantu.

Dukkhā muccantu yathā laddhasampattiyo mā vigacchantu kammassakā.

 

Puratthimāya disāya, pacchimāya disāya, uttarāya disāya, dakkhiṇāya disāya, puratthimāya anudisāya, pacchimāya anudisāya, uttarāya anudisāya, dakkhiṇāya anudisāya, heṭṭhimāya disāya, uparimāya disāya.

 

Sabbe sattā, sabbe pāṇā, sabbe bhūtā, sabbe puggalā, sabbe attabhāvapariyāpannā, sabbā itthiyo, sabbe purisā, sabbe ariyā, sabbe anariyā, sabbe devā, sabbe manussā, sabbe vinipātikā,

everā hontu, abyāpajjhā hontu, anīghā hontu, sukhī attānaṃ pariharantu.

Dukkhā muccantu yathā laddhasampattiyo mā vigacchantu kammassakā.

 

Uddhaṃ yāva bhavaggā ca, adho yāva avīcito,

samantā cakkavāḷesu, ye sattā paṭavīcarā,

abyāpajjhā nivera ca, niddukkhā cānupaddavā.

 

Uddhaṃ yāva bhavaggā ca, adho yāva avīcito,

samantā cakkavāḷesu, ye sattā udakecarā,

abyāpajjhā nivera ca, niddukkhā cānupaddavā.

 

Uddhaṃ yāva bhavaggā ca, adho yāva avīcito,

samantā cakkavāḷesu, ye sattā ākāsecarā,

abyāpajjhā nivera ca, niddukkhā cānupaddavā.

 

 

   

 

Namo tassa bhagavato arahato sammāsambuddhassa.

 

Buddhaṃ saraṇaṃ gacchāmi.

Dhammaṃ saraṇaṃ gacchāmi.

Saṅghaṃ saraṇaṃ gacchāmi.

Dutiyampi Buddhaṃ saraṇaṃ gacchāmi.

Dutiyampi Dhammaṃ saraṇaṃ gacchāmi.

Dutiyampi Saṅghaṃ saraṇaṃ gacchāmi.

Tatiyampi Buddhaṃ saraṇaṃ gacchāmi.

Tatiyampi Dhammaṃ saraṇaṃ gacchāmi.

Tatiyampi Saṅghaṃ saraṇaṃ gacchāmi.

 

 

Pañcasīlasamādāna

 

  1. Pāṇātipātā veramaṇī-sikkhāpadaṃ samādiyāmi.

  2. Adinnādānā veramaṇī-sikkhāpadaṃ samādiyāmi.

  3. Kāmesumicchācārā veramaṇī-sikkhāpadaṃ samādiyāmi.

  4. Musāvādā veramaṇī-sikkhāpadaṃ samādiyāmi.

  5. Surāmeraya-majjapamādaṭṭhānā veramaṇī-sikkhāpadaṃ samādiyāmi.

 

Buddhavandanā

 

itipi so bhagavā arahaṃ sammāsambuddho,

vijjācaraṇasampanno sugato lokavidū,

anuttaro purisadammasārathi,

satthā devamanussānaṃ buddho bhagavāti.

Namo tassa sammāsambuddhassa.

 

Dhammavandanā

 

Svākhāto bhagavatā dhammo,

sandiṭṭhiko akāliko,

ehipassiko opanayiko,

paccattaṃ veditabbo viññūhīti.

Namo tassa niyyānikassa dhammassa.

 

Saṅghavandanā

 

Supaṭipanno bhagavato sāvakasaṅgho,

ujupaṭipanno bhagavato sāvakasaṅgho,

ñāyapaṭipanno bhagavato sāvakasaṅgho,

sāmīcipaṭipanno bhagavato sāvakasaṅgho,

yadidaṃ cattari purisayugāni aṭṭha purisapuggalā,

esa bhagavato sāvakasaṅgho,

āhuneyyo pāhuneyyo,

dakkhiṇeyyo añjalikaraṇīyo,

anuttaraṃ puññakkhettaṃ lokassāti.

Namo tassa aṭṭha ariyapuggalā mahāsaṅghassa.

 

Maṅgalasutta

 

Evamme sutaṃ: Ekaṃ samayaṃ bhagavā sāvatthiyaṃ viharati,

jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā, yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi, ekamantaṃ ṭhitā kho sā devatā bhagavantaṃ gāthāya ajjhabhāsi.

 

  1. Bahū devā manussā ca, maṅgalāni acintayuṃ,
    ākaṅkhamānā sotthānaṃ brūhi maṅgalamuttamaṃ.

  1. Asevanā ca bālānaṃ, paṇḍitānañca sevanā,
    pūjā ca pūjanīyānaṃ, etammaṅgalamuttamaṃ.

     

  2. Paṭirūpadesavāso ca, pubbe ca katapuññatā,
    attasammāpaṇidhi ca, etammaṅgalamuttamaṃ.

     

  3. Bāhusaccañca sippañca, vinayo ca susikkhito,
    subhāsitā ca yā vācā, etammaṅgalamuttamaṃ.

     

  4. Mātāpitu-upaṭṭhānaṃ, puttadārassa saṅgaho,
    anākulā ca kammantā, etammaṅgalamuttamaṃ.

     

  5. Dānañca dhammacariyā ca, ñātakānañca saṅgaho,
    anavajjāni kammāni, etammaṅgalamuttamaṃ.

     

  6. Āratī viratī pāpā, majjapānā ca saññamo,
    appamādo ca dhammesu, etammaṅgalamuttamaṃ.

     

  7. Gāravo ca nivāto ca, santuṭṭhī ca kataññutā,
    kālena dhammassavanaṃ, etammaṅgalamuttamaṃ.

     

  8. Khantī ca sovacassatā, samaṇānañca dassanaṃ,
    kālena dhammasākacchā, etammaṅgalamuttamaṃ.

     

  9. Tapo ca brahmacariyañca, ariyasaccānadassanaṃ,
    nibbānasacchikiriyā ca, etammaṅgalamuttamaṃ.

     

  10. Phuṭṭhassa lokadhammehi, cittaṃ yassa na kampati,
    asokaṃ virajaṃ khemaṃ, etammaṅgalamuttamaṃ.

     

  11. Etādisāni katvāna, sabbatthamaparājitā,
    sabbattha sotthiṃ gacchanti, tantesaṃ maṅgalamuttamanti.

 

Karaṇīyamettasutta

 

  1. Karaṇīyamatthakusalena,
    yantaṃ santaṃ padaṃ abhisamecca,
    sakko ujū ca suhujū ca,
    suvaco cassa mudu anatimānī.

     

  2. Santussako ca subharo ca,
    appakicco ca sallahukavutti,
    santindriyo ca nipako ca,
    appagabbho kulesu ananugiddho.

     

  3. Na ca khuddaṃ samācare kiñci,
    yena viññū pare upavadeyyuṃ,
    sukhino vā khemino hontu,
    sabbe sattā bhavantu sukhitattā.

     

  4. Yekeci pāṇabhūtatthi,
    tasā vā thāvarā vā anavasesā,
    dīghā vā ye mahantā vā,
    majjhimā rassakā aṇukathūlā.

     

  5. Diṭṭhā vā ye va adiṭṭhā,
    ye va dūre vasanti avidūre,
    bhūtā vā sambhavesī vā,
    sabbe sattā bhavantu sukhitattā.

     

  6. Na paro paraṃ nikubbetha,
    nātimaññetha katthaci na kañci,
    byārosanā paṭīghasaññā,
    nāññamaññassa dukkhamiccheyya.

     

  7. Mātā yathā niyaṃ putta-,
    māyusā ekaputtamanurakkhe,
    evampi sabbabhūtesu,
    mānasambhāvaye aparimāṇaṃ.

     

  8. Mettañca sabbalokasmiṃ,
    mānasambhāvaye aparimāṇaṃ,
    uddhaṃ adho ca tiriyañca,
    asambādhaṃ averamāsapattaṃ.

     

  9. Tiṭṭhañcaraṃ nisinno vā,
    sayāno vā yāva tassa vigatamiddho,
    etaṃ satiṃ adhiṭṭheyya,
    brahmametaṃ vihāramidhamāhu.

     

  10. Diṭṭhiñca anupagamma,
    sīlavā dassanena sampanno,
    kāmesu vineyya gedhaṃ,
    na hi jātu gabbhaseyya punaretīti.

 

Buddhajayamaṅgalagāthā

 

Bāhuṃ sahassamabhinimmitasāvudhantaṃ,
krīmekhalaṃ uditaghorasasenamāraṃ;
dānādidhammavidhinā jitavā munindo,
tantejasā bhavatu te jayamaṅgalāni.

 

Mārātirekamabhiyujjhitasabbarattiṃ,

ghorampanāḷavakamakkhamathaddhayakkhaṃ;
khantīsudantavidhinā jitavā munindo,
tantejasā bhavatu te jayamaṅgalāni.

 

Nāḷāgiriṃ gajavaraṃ atimattabhūtaṃ,

dāvaggicakkamasanīva sudāruṇantaṃ;
mettambusekavidhinā jitavā munindo,
tantejasā bhavatu te jayamaṅgalāni.

 

Ukkhittakhaggamatihatthasudāruṇantaṃ,

dhāvantiyojanapathaṅgulimālavantaṃ;
iddhībhisaṅkhatamano jitavā munindo,
tantejasā bhavatu te jayamaṅgalāni.

 

Katvāna kaṭṭhamudaraṃ iva gabbhinīyā,

ciñcāya duṭṭhavacanaṃ janakāyamajjhe;
santena somavidhinā jitavā munindo,
tantejasā bhavatu te jayamaṅgalāni.

 

Saccaṃ vihāya matisaccakavādaketuṃ,

vādābhiropitamanaṃ atiandhabhūtaṃ;
paññāpadīpajalito jitavā munindo,
tantejasā bhavatu te jayamaṅgalāni.

 

Nandopanandabhujagaṃ vibudhaṃ mahiddhiṃ,

puttena therabhujagena damāpayanto;
iddhūpadesavidhinā jitavā munindo,
tantejasā bhavatu te jayamaṅgalāni.

 

Duggāhadiṭṭhibhujagena sudaṭṭahatthaṃ,

brahmaṃ visuddhijutimiddhibakābhidhānaṃ;
ñāṇāgadena vidhinā jitavā munindo,
tantejasā bhavatu te jayamaṅgalāni.

 

Etāpi buddhajayamaṅgala-aṭṭhagāthā,

yo vācako dinadine sarate matandī;
hitvānanekavividhāni cupaddavāni,
mokkhaṃ sukhaṃ adhigameyya naro sapañño.